Afrikaans is een van die kleurvolste tale, dit is dus g’n wonder dat van die mooiste gedigte uit die pen van Afrikaanse skrywers kom nie. Hier is ons 5 gunsteling Afrikaanse gedigte.

1. Ek Stuur Vir Jou `n Rooiborsduif – Breyten Breytenbach

Allerliefste, ek stuur vir jou ’n rooiborsduif

want niemand sal ’n boodskap wat rooi is skiet nie.

Ek gooi my rooiborsduif hoog in die lug en ek

weet al die jagters sal dink dis die son.

Kyk, my duif kom op en my duif gaan onder

en waar hy vlieg daar skitter oseane

en bome word groen

en hy kleur my boodskap so bruin oor jou vel

 

Want my liefde reis met jou mee,

my liefde moet soos ’n engel by jou bly,

soos vlerke, wit soos ’n engel.

Jy moet van my liefde bly weet

soos van vlerke waarmee jy nie kan vlieg nie

2. Bitterbessie Dagbreek- Ingrid Jonker.

Bitterbessie dagbreek
bitterbessie son
ʼn spieël het gebreek
tussen my en hom

Soek ek na die grootpad
om daarlangs te draf
oral draai die paadjies
van sy woorde af

Dennebos herinnering
dennebos vergeet
het ek ook verdwaal
trap ek in my leed

Papegaai-bont eggo
kierang kierang my
totdat ek bedroë
weer die koggel kry

Eggo is geen antwoord
antwoord hy alom
bitterbessie dagbreek
bitterbessie son

3. Stil aand- NP Van Wyk Louw

Vanaand het ek weer so verlang,

in grondelose vrees

van eie gryse eensaamheid,

dat jy by my moet wees,

dat ek die wye koeltes van

jou stem om my kan voel,

soos die rimp’ling van die somerreën

vervlugtig oor my spoel.

En toe ek deur die duister wind

wat oor my huisie waai,

die knip hoor lig, het heel my hart

in vreugde opgelaai …

Nou sit ons voor die vuur en speel

die vlamlig deur ons hare …

Laag waai die reënwind buite deur

die afgevalle blare.

4. Bicycle sonder slot- Koos Kombuis

Karin onthou jy ons kuiers met koeldrank
alleen in die kaia van jeugtyd se groen
onthou jy die dae van skoolbank en kerse
die nagte met honde en goed om te doen
Ek bring vir jou blomme
ek gee jou genot
ek leen jou my bicycle sonder n slot
ek weet dit is laat
en jou ma-hulle slaap
maar ek moes net vir jou sê
ek het jou lief soos die Kaap

Saam het ons buite geklim in die somer
en fietsgery al op die soom van n droom
wat is jy as jy groot is, is die lewe net stroomop?
Al ons vrae het gewapper soos vliëers aan n boom

Karin verstaan jy dat jare soos wyn
kan oud word in kanne vol vriendskap en son
weet jy dat net kinders liewe Jesus kan liefhê
maar dat kinder die wêreld al meer gaan verstom

5. Kô, lat ons sing- Adam Small

Vrinne
lat ons die Bybel oepeslaan
en lat ons daaryt lies –
o Allahoegste Gies
lat hierie woorde na onse harte gaan! –
yt die twiere boek van Mosas
yt die Exoras
yt die viere hoefstuk die ee’ste en die twiere verse –
o God
maak vi’ ons lig moet hierie woorde soes moet kerse! –

toe antwoord Mosas en hy sê: ma’ wat
as hulle my nie glo, nie aan my woorde vat
as hulle sê die Here het nie ga-appear aan my?

ma’ die Here sê vi’ hom: djy sal djou mense lei
wat’s in djou hand?
en Mosas sê: ‘n staf

 

nou vrinne
dit was al wat hy gahad het
hierie man van God
’n staf
’n dooie stok
en boenop het hy nog gahakkel ok

ma’ die Here het toe lank moet hom gapraat
oor hoe hy moet daai kierie doodgaslaat
het die Egiptenaar
en Mosas het sy groote kop lat hang
en toe
toe skielak was daai selfde kierie in sy hand ’n slang!

nou vrinne
die Here het gabring
aan my sy wonnerwerke oek so
hy het gavra wat’s in my hand
en vrinne
in my hand was my kitaar

kô, lat ons sing

KRY ONMIDDELIK R50 AFSLAG vir enige aankope bo R200

Teken in vir die Posmeester - lag lag die maklikste manier om deel te word van ons gemeenskap, vra maar die duisendes wat dit reeds gedoen het!

 

R50 AF

*Jou inligting is veilig by ons, ons hanteer e-pos adresse soos goud.